ꦩꦸꦭꦥꦝꦱꦶꦪꦒ

ꦮꦲꦺꦴꦱ꧀ꦱꦤ꧀

1 ꦠꦺꦱꦭꦺꦴꦤꦶꦏ 4, 1-8

ꦱꦶꦁꦢꦶꦏꦽꦱꦏ꧀ꦲꦏꦺꦒꦸꦱ꧀ꦠꦶꦪꦲꦶꦏꦸꦏꦱꦸꦕꦶꦪꦤ꧀ꦩꦸ ꧉

ꦩꦠꦺꦪꦸꦱ꧀ 25, 1-13

ꦒꦭꦺꦴꦥꦔꦤ꧀ꦠꦺꦤ꧀ꦤꦺꦠꦼꦏ꧈ꦲꦒꦺꦥꦝꦥꦥꦒ꧀ꦤ꧉

ꦤꦭꦶꦏꦱꦩꦤꦒꦸꦱ꧀ꦠꦶꦪꦼꦱꦸꦱ꧀ꦔꦤ꧀ꦢꦶꦏꦥꦱꦼꦩꦺꦴꦤ꧀ꦩꦁꦏꦺꦤꦺ:"ꦏꦿꦠꦺꦴꦤ꧀ꦤꦶꦁꦄꦭ꧀ꦭꦃꦲꦶꦏꦸꦲꦸꦥꦩꦤꦺꦥꦠꦃꦱꦼꦥꦸꦭꦸꦃ꧈ꦱꦶꦁꦥꦝꦔ꧀ꦒꦮꦢꦶꦪꦤ꧀ꦲꦉꦥ꧀ꦩꦥꦒ꧀ꦲꦏꦺꦥꦔꦤ꧀ꦠꦺꦤ꧀꧉ꦤꦔꦶꦁꦱꦶꦁꦭꦶꦩꦧꦺꦴꦝꦺꦴ꧈ꦱꦶꦁꦭꦶꦩꦥꦶꦤ꧀ꦠꦼꦂ꧉ꦱꦶꦁꦧꦺꦴꦝꦺꦴꦪꦧꦼꦤꦼꦂꦒꦮꦢꦶꦪꦤ꧀‌ꦤꦔꦶꦁꦲꦺꦴꦫꦱꦔꦸꦊꦔ꧉ꦱꦶꦁꦥꦶꦤ꧀ꦠꦂꦒꦮꦢꦶꦪꦤ꧀ꦭꦤ꧀ꦱꦔꦸꦊꦔꦲꦤꦲꦶꦁꦒꦼꦤ꧀ꦢꦸꦭ꧀꧉ꦥꦔꦤ꧀ꦠꦺꦤ꧀ꦤꦺꦱꦸꦮꦺꦲꦺꦴꦫꦠꦼꦏꦠꦼꦏ꧉ꦥꦫꦥꦠꦃꦥꦝꦔꦤ꧀ꦠꦸꦏ꧀ꦭꦤ꧀ꦏꦼꦠꦸꦫꦺꦴꦤ꧀꧉ꦮꦪꦃꦠꦼꦔꦃꦧꦼꦔꦶꦢꦸꦩꦢꦏ꧀ꦏꦤ꧀ꦲꦤꦱꦶꦁꦲꦭꦺꦴꦏ꧀:'ꦒꦭꦺꦴꦥꦔꦤ꧀ꦠꦺꦤ꧀ꦤꦺꦠꦼꦏ꧈ꦲꦒꦺꦥꦝꦥꦥꦒ꧀ꦤ꧉'ꦏꦧꦼꦃꦥꦝꦒꦿꦒꦥ꧀ꦥꦤ꧀ꦠꦔꦶꦭꦤ꧀ꦢꦤ꧀ꦢꦤꦶꦢꦶꦪꦤ꧀ꦤꦺꦝꦺꦮꦺꦝꦺꦮꦺ꧉ꦱꦶꦁꦧꦺꦴꦝꦺꦴꦤꦼꦩ꧀ꦧꦸꦁꦩꦫꦁꦱꦶꦁꦥꦶꦤ꧀ꦠꦼꦂ:'ꦲꦏꦸꦗꦭꦸꦏ꧀ꦭꦼꦔꦩꦸ꧈ꦢꦶꦪꦤ꧀ꦏꦸꦲꦉꦥ꧀ꦩꦠꦶ꧉'ꦤꦔꦶꦁꦱꦶꦁꦥꦶꦤ꧀ꦠꦼꦂꦩꦁꦱꦸꦭ꧀ꦭꦶ:'ꦠꦶꦤꦶꦩ꧀ꦧꦁꦲꦺꦴꦫꦕꦸꦏꦸꦥ꧀ꦏꦁꦒꦺꦴꦲꦏꦸꦏꦺꦴꦮꦺ꧈ꦏꦤꦠꦸꦏꦸꦮꦊꦔꦧꦲꦺ꧉'ꦤꦔꦶꦁꦤꦭꦶꦏꦭꦒꦶꦥꦝꦠꦸꦏꦸꦊꦔ꧈ꦥꦔꦤ꧀ꦠꦺꦤ꧀ꦤꦺꦠꦼꦏꦭꦤ꧀ꦏꦧꦺꦃꦱꦶꦁꦮꦶꦱ꧀ꦱꦶꦪꦒꦥꦝꦔꦫꦏ꧀ꦥꦔꦤ꧀ꦠꦺꦤ꧀ꦤꦺꦩ꧀ꦭꦼꦧꦸꦲꦶꦁꦥꦗꦒꦺꦴꦁꦔꦤ꧀꧉ꦢꦺꦤꦺꦒꦥꦸꦫꦤꦸꦭꦶꦢꦶꦠꦸꦠꦸꦥ꧀꧉ꦮꦱꦤꦤ꧀ꦤꦺꦱꦶꦁꦥꦝꦠꦸꦏꦸꦊꦔꦥꦝꦢꦼꦏꦭꦤ꧀ꦧꦼꦔꦏ꧀ꦧꦼꦔꦺꦴꦏ꧀:'ꦧꦥꦏ꧀ꦧꦥꦏ꧀ꦏꦸꦭꦚꦸꦮꦸꦤ꧀ꦏꦺꦴꦤꦠꦼꦤ꧀꧉'ꦤꦔꦶꦁꦩꦭꦃꦢꦶꦮꦁꦱꦸꦭ꧀ꦭꦶ:'ꦧ꧀ꦭꦏꦤ꧀ꦤꦺ꧈ꦲꦏꦸꦲꦺꦴꦫꦮꦤꦸꦃꦏꦫꦺꦴꦏꦺꦴꦮꦺ꧉'ꦩꦸꦭꦥꦝꦱꦶꦪꦒ꧈ꦲꦮꦶꦠ꧀ꦏꦺꦴꦮꦺꦲꦺꦴꦫꦔꦽꦠꦶꦢꦶꦤꦭꦤ꧀ꦮꦼꦏ꧀ꦠꦸꦤꦺ꧉"

ꦥꦁꦭꦶꦩ꧀ꦧꦁ

ꦫꦱꦸꦭ꧀ꦥꦲꦸꦭꦸꦱ꧀ꦔꦺꦭꦶꦁꦔꦏꦺꦲꦗꦏ꧀ꦏꦤ꧀ꦏꦧꦺꦃꦥꦟ꧀ꦝꦺꦫꦺꦏ꧀ꦒꦸꦱ꧀ꦠꦶꦟ꧀ꦛꦶꦕꦫꦠꦼꦩꦼꦤ꧀ꦤꦤ꧀ꦤꦁꦒꦥ꧀ꦥꦶꦲꦗꦏ꧀ꦏꦤ꧀ꦏꦁꦒꦺꦴꦲꦸꦫꦶꦥ꧀ꦏꦱꦸꦕꦶꦪꦤ꧀꧉ꦮꦺꦴꦁꦮꦺꦴꦁꦠꦺꦱꦭꦺꦴꦤꦶꦏꦮꦸꦱ꧀ꦤꦩ꧀ꦥꦥꦔꦤ꧀ꦢꦼꦭ꧀ꦱꦏꦥꦲꦸꦭꦸꦱ꧀ꦤꦔꦶꦁꦲꦶꦏꦶꦲꦺꦴꦫꦲꦠꦼꦒꦼꦱ꧀ꦱꦏꦺꦃꦲꦶꦁꦲꦢꦠ꧀ꦏꦥꦽꦕꦪꦤ꧀ꦧꦚ꧀ꦗꦸꦂꦲꦶꦭꦁ꧉ꦏꦁꦒꦺꦴꦚꦶꦁꦏꦶꦂꦫꦶꦲꦶꦏꦸꦩꦲꦸꦥꦲꦸꦭꦸꦱ꧀ꦔꦗꦏ꧀ꦲꦸꦫꦶꦥ꧀ꦏꦟ꧀ꦛꦶꦱꦼꦩꦁꦠ꧀ꦢꦊꦩ꧀ꦲꦾꦁꦫꦺꦴꦃꦱꦸꦕꦶ꧈ꦱꦶꦁꦢꦶꦥꦫꦶꦁꦔꦏꦺꦢꦺꦤꦶꦁꦄꦭ꧀ꦭꦃꦥꦶꦪꦩ꧀ꦧꦏ꧀꧉

ꦏꦗꦧꦱꦶꦪꦒꦒꦸꦱ꧀ꦠꦶꦲꦸꦒꦔꦚ꧀ꦗꦸꦂꦫꦏꦺꦱꦸꦥꦪꦥꦝꦮꦶꦕꦏ꧀ꦱꦤꦭꦤ꧀ꦮꦱ꧀ꦥꦢ꧉ꦥꦿꦶꦧꦢꦶꦱꦶꦁꦮꦶꦕꦏ꧀ꦱꦤꦱꦒꦸꦃꦤꦼꦩ꧀ꦠꦺꦴꦏ꧀ꦲꦏꦺꦥꦶꦭꦶꦃꦲꦤ꧀ꦭꦤ꧀ꦔꦿꦩ꧀ꦥꦸꦁꦔꦏꦺꦱꦶꦁꦧꦼꦤꦼꦂ꧉ꦝꦮꦸꦃꦲꦶꦁꦆꦚ꧀ꦗꦶꦭ꧀ꦱꦲꦶꦏꦶꦏꦸꦢꦸꦮꦶꦱ꧀ꦢꦶꦮꦶꦮꦶꦠ꧀ꦠꦶ꧈ꦩꦸꦟ꧀ꦝꦏ꧀ꦩꦼꦁꦏꦺꦴꦲꦺꦴꦫꦫꦩ꧀ꦥꦸꦁꦱꦩꦁꦱꦥꦔꦤ꧀ꦫꦺꦤ꧀ꦤꦺꦏꦏꦸꦁꦫꦮꦸꦃ꧉ꦥꦱꦩꦸꦮꦤ꧀ꦱꦸꦕꦶꦲꦤꦲꦶꦁꦏꦺꦤꦺꦢꦶꦱꦼꦧꦸꦠ꧀ꦥꦔꦤ꧀ꦠꦺꦤ꧀ꦥꦸꦠꦿꦶ꧈ꦱꦶꦁꦕꦼꦕꦮꦶꦱ꧀ꦲꦉꦥ꧀ꦤꦩ꧀ꦥꦫꦮꦸꦃꦲꦺꦥꦔꦤ꧀ꦠꦺꦤ꧀ꦏꦏꦸꦁꦪꦲꦶꦏꦸꦱꦁꦏꦿꦶꦱ꧀ꦠꦸꦱ꧀꧉

ꦱꦼꦩ꧀ꦧꦃꦪꦁ

ꦄꦭ꧀ꦭꦃꦲꦶꦁꦏꦁꦩꦲꦏꦸꦮꦱ꧈ꦏꦮꦸꦭꦩꦸꦚ꧀ꦗꦸꦏ꧀ꦱꦼꦩ꧀ꦧꦃꦤꦸꦮꦸꦤ꧀ꦢꦺꦤꦺꦱꦩ꧀ꦥꦸꦤ꧀ꦏꦽꦱꦔꦿꦮꦸꦃꦲꦶꦏꦮꦸꦭꦭꦤ꧀ꦠꦫꦤ꧀ꦱꦿꦶꦪꦺꦱꦸꦱ꧀‌ꦥꦸꦠꦿꦢꦊꦩ꧀꧈ꦲꦶꦁꦒꦶꦃꦲꦸꦠꦸꦱ꧀ꦱꦤ꧀ꦤꦶꦁꦏꦠꦽꦱ꧀ꦤꦤ꧀ꦢꦊꦩ꧀ꦝꦠꦼꦁꦩꦤꦸꦁꦱ꧉ꦩꦸꦒꦶꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦠꦤ꧀ꦱꦃꦢꦢꦺꦴꦱ꧀ꦥꦤ꧀ꦢꦼꦁꦔꦤ꧀ꦏꦮꦸꦭꦲꦶꦁꦱꦩꦸꦏꦮꦶꦱ꧀ꦠꦶꦤ꧀ꦢꦏ꧀ꦠꦤ꧀ꦢꦸꦏ꧀ꦏꦮꦸꦭ꧉ꦗꦼꦂꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦥꦸꦤꦶꦏꦲꦶꦁꦏꦁꦗꦸꦩꦼꦤꦼꦁꦲꦶꦁꦱꦭꦩꦶꦭꦩꦶꦤꦶꦥꦸꦤ꧀꧉

ꦲꦩꦶꦤ꧀

---

Waosan

1Tès. 4, 1-8

Sing dikarsakaké Gusti yaiku kasucianmu.

Matéus 25, 1-13

Galo pangantèné teka, agé padha papagna.

Nalika samana Gusti Yésus ngandika pasemon mangkéné: "Kratoning Allah iku upamané patah sepuluh, sing padha nggawa diyan arep mapagaké pangantèn. Nanging sing lima bodho, sing lima pinter. Sing bodho ya bener nggawa diyan, nanging ora sangu lenga. Sing pinter nggawa diyan lan sangu lenga ana ing gendul. Pangantèné suwé ora teka-teka. Para patah padha ngantuk lan keturon. Wayah tengah bengi dumadakan ana sing alok: 'Galo pangantèné teka, agé padha papagna!' Kabèh padha gragapan tangi lan ndandani diyané dhéwé-dhéwé. Sing bodho nembung marang sing pinter: 'Aku jaluk lengamu. Diyanku arep mati'. Nanging sing pinter mangsuli: 'Tinimbang ora cukup kanggo aku-kowé, kana tukua lenga baé!' Nanging nalika lagi padha tuku lenga, pangantèné teka, lan kabèh sing wis siyaga padha ngarak pangantèn mlebu ing pajagongan. Déné gapura nuli ditutup. Wasanané sing padha tuku lenga padha teka lan bengak-bengok: 'Bapak, bapak, kula nyuwun konten'. Nanging malah diwangsuli: 'Blakané, aku ora wanuh karo kowé'. Mula padha siyaga, awit kowé ora ngerti dina lan wektuné".

Panglimbang

Rasul Paulus ngélingaké ajakan kabèh pandhèrèk Gusti kanthi cara temenan nanggapi ajakan kanggo urip kasucian. Wong-wong Tesalonika wus nampa pangandel saka Paulus, nanging iki ora ateges sakèhing adat kapercayan banjur ilang. Kanggo nyingkiri iku mau Paulus ngajak urip kanthi semangat Dalem Hyang Roh Suci, sing diparingaké déning Allah piyambak.

Kajaba siyaga Gusti uga nganjuraké supaya padha wicaksana lan waspada. Pribadi sing wicaksana saguh nemtokaké pilihan lan ngrampungaké sing bener. Dhawuhing Injil saiki kudu wis diwiwiti, mundhak mengko ora rampung samangsa pangantèné kakung rawuh. Pasamuwan Suci ana ing kéné disebut pangantèn putri, sing cecawis arep nampa rawuhé pangantèn kakung, yaiku Sang Kristus.

Sêmbahyang

Allah ingkang Mahakuwasa, kawula munjuk sembah nuwun déné sampun karsa ngrawuhi kawula lantaran Sri Yésus, Putra Dalem, inggih utusaning katresnan Dalem dhateng manungsa. Mugi Panjenenganipun tansah dados pandengan kawula ing samukawis tindak-tanduk kawula. Jer Panjenenganipun punika ingkang jumeneng ing salami-laminipun.

Amin.