ꦲꦸꦫꦶꦥ꧀ꦭꦁꦒꦼꦁ
ꦥꦁꦭꦶꦩ꧀ꦧꦁ
ꦲꦤꦲꦶꦁꦕꦿꦶꦠꦥꦼꦮꦪꦁꦔꦤ꧀ꦧꦶꦩꦪꦺꦤ꧀ꦲꦉꦥ꧀ꦲꦺꦤ꧀ꦠꦸꦏ꧀ꦠꦺꦴꦪꦱꦸꦕꦶꦥꦽꦮꦶꦠꦱꦫꦶꦪꦲꦶꦏꦸꦔꦺꦭ꧀ꦩꦸꦏꦱꦩ꧀ꦥꦸꦂꦤꦤꦶꦁꦲꦸꦫꦶꦥ꧀ꦏꦫꦺꦴꦒꦸꦫꦸꦤꦺꦥꦟ꧀ꦝꦶꦠꦢꦸꦂꦤꦏꦸꦢꦸꦏꦺꦴꦤ꧀ꦩ꧀ꦭꦼꦧꦸꦲꦶꦁꦝꦱꦂꦫꦶꦁꦱꦩꦸꦢꦿ꧉ꦔꦽꦠꦺꦤ꧀ꦤꦶꦲꦔꦺꦭ꧀ꦭꦺꦱꦾꦫꦠ꧀ꦩꦺꦭꦸꦲꦗꦂꦫꦤ꧀ꦒꦸꦫꦸꦤꦺꦱꦢꦸꦭꦸꦂꦱꦢꦸꦭꦸꦂꦧꦶꦩꦚꦫꦤ꧀ꦲꦏꦺꦩꦸꦤ꧀ꦢꦸꦂꦧꦲꦺ꧉ꦥꦸꦤ꧀ꦠꦝꦺꦮꦏꦁꦩꦱ꧀ꦱꦺꦧꦶꦩꦔꦤ꧀ꦢꦶꦏꦲꦸꦫꦸꦁꦤꦤꦶꦪꦠ꧀ꦩꦸꦩꦼꦒꦸꦫꦸꦏꦫꦺꦴꦥꦟ꧀ꦝꦶꦠꦢꦸꦂꦤ꧈ꦤꦔꦶꦁꦧꦶꦩꦠꦼꦠꦼꦥ꧀ꦏꦼꦏꦼꦃꦏꦫꦺꦴꦏꦼꦥꦸꦠꦸꦱ꧀ꦱꦤ꧀ꦤꦺꦝꦺꦮꦺꦪꦺꦤ꧀ꦲꦥꦱꦶꦁꦢꦶꦮꦸꦭꦁꦔꦏꦺꦒꦸꦫꦸꦤꦺꦲꦶꦏꦸꦧꦼꦧꦼꦂ꧉ꦱꦼꦥꦶꦱꦤ꧀ꦩꦤꦺꦃꦢꦸꦂꦤꦤꦤ꧀ꦠꦁꦩꦸꦫꦶꦢ꧀ꦢꦺꦲꦥꦏꦺꦴꦮꦺꦧꦶꦩꦩꦸꦫꦶꦢ꧀ꦏꦸꦏꦶꦤꦱꦶꦃꦲꦉꦥ꧀ꦩꦸꦤ꧀ꦢꦸꦂꦏꦪꦱꦢꦸꦭꦸꦂꦱꦢꦸꦭꦸꦂꦩꦸ꧉ꦲꦠꦸꦂꦫꦺꦧꦶꦩꦏꦸꦭꦠꦶꦪꦁꦱꦠꦿꦶꦪꦧꦺꦴꦠꦼꦤ꧀ꦧꦝꦺꦩꦸꦤ꧀ꦢꦸꦂꦱꦢꦺꦫꦺꦁꦔꦶꦥꦸꦤ꧀ꦥꦶꦏꦤ꧀ꦠꦸꦏ꧀ꦲꦶꦁꦏꦁꦏꦸꦭꦥꦢꦺꦴꦱ꧀ꦱꦶꦲꦶꦁꦒꦶꦃꦥꦸꦤꦶꦏꦔꦺꦭ꧀ꦩꦸꦏꦱꦩ꧀ꦥꦸꦂꦤꦤꦶꦁꦲꦸꦫꦶꦥ꧀ꦱꦥꦶꦤ꧀ꦠꦼꦤ꧀ꦤꦲꦮꦿꦠ꧀ꦩꦽꦒꦶꦲꦶꦁꦏꦁꦏꦸꦭꦠꦁꦒꦸꦁ꧉ꦧꦶꦩꦚꦼꦩ꧀ꦥ꧀ꦭꦸꦁꦲꦶꦁꦝꦱꦂꦫꦶꦁꦱꦩꦸꦢꦿꦏꦼꦠꦼꦩꦸꦏꦫꦺꦴꦱꦁꦲꦾꦁꦮꦼꦤꦁꦭꦤ꧀ꦢꦶꦒꦩ꧀ꦧ꧀ꦭꦁꦔꦏꦺꦲꦥꦠꦼꦒꦼꦱ꧀ꦱꦺꦲꦸꦫꦶꦥ꧀ꦱꦼꦗꦠꦶꦏꦱꦩ꧀ꦥꦸꦂꦤꦤꦶꦁꦲꦸꦫꦶꦥ꧀
ꦱꦮꦶꦱ꧀ꦱꦺꦒꦸꦱ꧀ꦠꦶꦪꦺꦱꦸꦱ꧀ꦥꦫꦶꦁꦥꦶꦮꦸꦭꦁꦧꦧ꧀ꦫꦺꦴꦠꦶꦲꦸꦫꦶꦥ꧀ꦲꦏꦺꦃꦥꦫꦩꦸꦫꦶꦢ꧀ꦢꦺꦩꦸꦤ꧀ꦢꦸꦂ꧉ꦠꦼꦠꦼꦩ꧀ꦧꦸꦁꦔꦤ꧀ꦲꦶꦏꦶꦏꦼꦫꦱ꧀ꦠꦼꦩꦼꦤ꧀ꦤꦤ꧀ꦏꦁꦧꦼꦠꦃꦔꦿꦸꦔꦺꦴꦏ꧀ꦲꦏꦺꦧꦲꦺꦱꦥ꧉ꦥꦫꦩꦸꦫꦶꦢ꧀ꦲꦺꦴꦫꦱꦒꦸꦃꦤꦼꦒꦼꦱ꧀ꦥꦔꦤ꧀ꦢꦶꦏꦤ꧀ꦤꦺꦒꦸꦱ꧀ꦠꦶꦪꦺꦱꦸꦱ꧀꧉ꦧꦺꦴꦏ꧀ꦩꦤꦮꦥꦫꦩꦸꦫꦶꦢ꧀ꦩꦶꦏꦶꦂꦥꦶꦮꦸꦭꦂꦲꦶꦏꦶꦏꦱꦂꦥꦶꦪꦺꦮꦺꦴꦁꦏꦸꦢꦸꦩꦔꦤ꧀ꦱꦭꦶꦫꦭꦤ꧀ꦫꦃꦢꦊꦩ꧀꧉ꦥꦫꦩꦸꦫꦶꦢ꧀ꦲꦺꦴꦫꦒꦼꦭꦼꦩ꧀ꦫꦺꦥꦺꦴꦠ꧀ꦫꦺꦥꦺꦴꦠ꧀ꦔꦼꦠꦸꦠ꧀ꦲꦏꦺꦥꦶꦮꦸꦭꦁꦱꦶꦁꦲꦔꦺꦭ꧀ꦏꦼꦥꦺꦔꦶꦤ꧀ꦤꦺꦒꦩ꧀ꦥꦁꦭꦤ꧀ꦚꦼꦤꦼꦁꦔꦏꦺ꧉ꦤꦔꦶꦁꦢꦶꦲꦗꦏ꧀ꦩꦶꦏꦶꦂꦱꦶꦁꦏꦼꦫꦱ꧀ꦭꦤ꧀ꦏꦥꦶꦠꦪꦤ꧀ꦱꦶꦁꦗꦼꦫꦺꦴꦥꦝꦒꦽꦱꦸ꧉ꦒꦸꦱ꧀ꦠꦶꦪꦺꦱꦸꦱ꧀ꦔꦤ꧀ꦢꦶꦏꦩꦫꦁꦥꦫꦩꦸꦫꦶꦢ꧀ꦲꦥꦏꦺꦴꦮꦺꦲꦺꦴꦫꦥꦝꦲꦉꦥ꧀ꦭꦸꦔꦲꦸꦒ꧉ꦲꦠꦸꦂꦮꦁꦱꦸꦭ꧀ꦭꦤ꧀ꦤꦺꦱꦶꦩꦺꦴꦤ꧀ꦥꦺꦠꦿꦸꦱ꧀ꦒꦸꦱ꧀ꦠꦶꦲꦶꦁꦏꦁꦏꦸꦭꦥꦸꦫꦸꦒꦶꦱꦶꦤ꧀ꦠꦼꦤ꧀ꦥꦔꦤ꧀ꦢꦶꦏꦥꦢꦸꦏꦥꦸꦤꦶꦏꦥꦔꦤ꧀ꦢꦶꦏꦤ꧀ꦤꦶꦁꦒꦼꦱꦁꦭꦁꦒꦼꦁꦱꦲꦏꦮꦸꦭꦱꦩ꧀ꦥꦸꦤ꧀ꦱꦩꦶꦥꦶꦠꦢꦺꦴꦱ꧀ꦠꦸꦮꦶꦤ꧀ꦱꦸꦩꦼꦉꦥ꧀ꦧꦶꦭꦶꦃꦥꦢꦸꦏꦥꦸꦤꦶꦏꦱꦁꦱꦸꦕꦶꦏꦒꦸꦔꦤ꧀ꦤꦶꦁꦄꦭ꧀ꦭꦃ꧉
ꦱꦶꦩꦺꦴꦤ꧀ꦥꦺꦠꦿꦸꦱ꧀ꦏꦪꦧꦶꦩꦲꦺꦴꦫꦒꦼꦊꦩ꧀ꦩꦸꦤ꧀ꦢꦸꦂꦱꦏꦗꦼꦁꦏꦭ꧀꧉ꦥꦺꦠꦿꦸꦱ꧀ꦮꦸꦱ꧀ꦱꦶꦤ꧀ꦠꦼꦤ꧀ꦒꦸꦱ꧀ꦠꦶꦪꦺꦱꦸꦱ꧀ꦥꦸꦤꦶꦏ꧈ꦒꦸꦱ꧀ꦠꦶꦥꦸꦤꦶꦏꦲꦸꦠꦸꦱ꧀ꦱꦤ꧀ꦤꦶꦁꦄꦭ꧀ꦭꦃ꧉ꦱꦧ꧀ꦢꦤꦶꦥꦸꦤ꧀ꦥꦸꦤꦶꦏꦱꦧ꧀ꦢꦒꦼꦱꦁꦭꦁꦒꦼꦁ꧉ꦏꦼꦥꦺꦔꦶꦤ꧀ꦲꦸꦫꦶꦥ꧀ꦭꦁꦒꦼꦁꦏꦶꦠꦏꦸꦢꦸꦝꦺꦫꦺꦏ꧀ꦒꦸꦱ꧀ꦠꦶꦪꦺꦱꦸꦱ꧀ꦩꦶꦏꦸꦭ꧀ꦱꦭꦶꦧ꧀ꦠꦸꦤꦠꦸꦠ꧀ꦠꦤ꧀ꦒꦸꦱ꧀ꦠꦶꦪꦺꦱꦸꦱ꧀ꦥꦚ꧀ꦕꦺꦤ꧀ꦲꦧꦺꦴꦠ꧀ꦤꦔꦶꦁꦪꦺꦤ꧀ꦏꦶꦠꦱꦼꦠꦾꦝꦺꦫꦺꦏ꧀ꦒꦸꦱ꧀ꦠꦶꦪꦺꦱꦸꦱ꧀ꦏꦶꦠꦤꦩ꧀ꦥꦲꦸꦫꦶꦥ꧀ꦭꦁꦒꦼꦁ꧉ꦱꦩꦺꦴꦤꦺꦴꦲꦸꦒꦲꦮꦏ꧀ꦏꦺꦝꦺꦮꦺꦲꦥꦲꦉꦥ꧀ꦩꦸꦤ꧀ꦢꦸꦂ꧉
ꦱꦼꦩ꧀ꦧꦃꦪꦁ
ꦒꦸꦱ꧀ꦠꦶ꧈ꦏꦮꦸꦭꦚꦸꦮꦸꦤ꧀ꦱꦒꦼꦢ꧀ꦢꦗꦩ꧀ꦥꦶꦲꦶꦁꦏꦁꦱꦏꦶꦁꦱꦶꦃꦏꦮꦼꦭꦱ꧀ꦱꦤ꧀ꦢꦊꦩ꧀ꦏꦮꦸꦭꦠꦩ꧀ꦥꦶꦩꦏꦂꦪꦥꦼꦤꦸꦃꦲꦶꦁꦏꦮꦸꦭꦱꦲꦩꦸꦒꦶꦏꦮꦸꦭꦏꦗꦁꦏꦸꦁꦔꦱꦂꦠꦏꦢꦢꦺꦴꦱ꧀ꦤꦱꦩ꧀ꦥꦸꦂꦤꦲꦩꦿꦶꦃꦱꦒꦼꦢ꧀ꦢꦢꦩꦼꦭ꧀ꦉꦤꦢꦊꦩ꧀ꦒꦸꦱ꧀ꦠꦶꦲꦶꦁꦏꦮꦺꦴꦤ꧀ꦠꦼꦤ꧀ꦤꦤ꧀ꦩꦤꦺꦏꦮꦂꦤꦭꦤ꧀ꦠꦫꦤ꧀ꦱꦁꦏꦿꦶꦱ꧀ꦠꦸꦱ꧀ꦒꦸꦱ꧀ꦠꦶꦏꦮꦸꦭ꧉
ꦲꦩꦶꦤ꧀
Waosan
Panglimbang
Ana ing crita pewayangan, Bima yèn arep éntuk Toya Suci Perwita Sari, yaiku ngelmu kasampurnaning urip, karo guruné Pandita Durna kudu kon mlebu ing dhasaring samodra. Ngertèni angèlé syarat mèlu ajaran guruné, sadulur-sadulur Bima nyaranaké mundur waé. Puntadewa kangmasé Bima ngandika, urungna niatmu meguru karo Pandita Durna. Nanging Bima tetep kekeh karo keputusané dhéwé, yèn apa sing diwulangaké guruné iku bener. Sepisan maneh Durna nantang muridé, "apa kowé Bima, muridku kinasih, arep mundur kaya sadulur-sadulurmu?" Aturé Bima, "kula tiyang ksatria, boten badhé mundur sakdèrèngipun pikantuk ingkang kula padosi, inggih punika ngèlmu kasampurnaning urip, sepintena awrat margi ingkang kula tanggung". Bima nyemplung ing dhasaring samodra, ketemu karo Sang Hyang Wenang lan digamblangaké apa tegesé urip sejati, kasampurnaning urip.
Sakwisé Gusti Yésus paring piwulang bab roti urip, akèh para muridé mundur. "Tetembungan iki keras temenan, kang betah ngrungokaké baé sapa?" Para murid ora saguh neges pangandikané Gusti Yésus. Bokmenawa para murid mikir, piwulang iki kasar. Piyé wong kudu mangan Salira lan Rah Dalem. Para murid ora gelem repot-repot ngetutaké piwulang sing angèl, kepénginé gampang lan nyenengaké. Nanging diajak mikir sing keras lan kapitayan sing jero padha nggresula. Gusti Yésus ngandika marang para murid, "Apa kowé ora padha arep lunga uga?" Atur wangsulané Simon Pétrus, "Gusti, ingkang kula purugi sinten? Pangandika Paduka punika pangandikaning gesang langgeng. Saha kawula sampun sami pitados tuwin sumerep, bilih Paduka punika Sang Suci kagunganing Allah."
Simon Petrus kaya Bima, ora gelem mundur saka jengkal. Pétrus wus mangerti sinten Gusti Yésus punika. Gusti punika utusaning Allah. Sabdanipun punika sabda gesang langgeng. Kepéngin urip langgeng, kita kudu ndhérék Gusti Yésus mikul salib. Tuntutan Gusti Yésus pancèn abot. Nanging yèn kita setya ndhèrèk Gusti Yésus, kita nampa urip langgeng. Semono uga awaké dhéwé apa arep mundur?
Sêmbahyang
Gusti, kawula nyuwun sageda jampi, ingkang saking sih kawelasan Dalem kawula tampi, makarya penuh ing kawula, saha mugi kawula kajangkunga sarta kadadosna sampurna, amrih sageda damel rena Dalem Gusti ing kawontenan manéka warna. Lantaran Sang Kristus, Gusti kawula.
Amin.
Tidak ada komentar: