ꦱꦥꦧꦲꦺꦱꦶꦁ​ꦏꦼꦠꦼꦩꦸ꧈​ꦲꦸꦤ꧀ꦢꦁ​ꦔꦼꦤ꧀ꦧꦺꦴꦗꦤ

ꦮꦲꦺꦴꦱ꧀ꦱꦤ꧀

ꦗꦏ꧀ꦱ 11, 29-39a

ꦱꦥꦧꦲꦺꦩꦼꦠꦸꦝꦶꦱꦶꦏ꧀ꦝꦺꦮꦺꦱꦏꦲꦶꦁꦲꦺꦴꦩꦃꦧꦏꦭ꧀ꦢꦏ꧀ꦏꦸꦂꦧꦤ꧀ꦲꦏꦺꦏꦺꦴꦚ꧀ꦗꦸꦏ꧀ꦲꦶꦁꦥꦔꦺꦫꦤ꧀꧉

ꦩꦠꦺꦪꦸꦱ꧀ 22, 1-14

ꦱꦥꦧꦲꦺꦱꦶꦁꦏꦼꦠꦼꦩꦸ꧈ꦲꦸꦤ꧀ꦢꦁꦔꦼꦤ꧀ꦧꦺꦴꦗꦤ꧉

ꦥꦁꦭꦶꦩ꧀ꦧꦁ

ꦮꦺꦴꦁꦮꦺꦴꦁꦆꦱꦿꦌꦭ꧀ꦲꦔꦺꦭ꧀ꦧꦔꦺꦠ꧀ꦲꦉꦥ꧀ꦤꦶꦁꦒꦭ꧀ꦧꦿꦲꦭꦧꦿꦲꦭꦤꦺ꧉ꦲꦶꦁꦏꦺꦤꦺꦠꦶꦤꦼꦩꦸꦠꦸꦭꦝꦤꦺꦪꦼꦥ꧀ꦠꦥꦿꦱꦼꦠꦾꦩꦫꦁꦥꦔꦺꦫꦤ꧀ꦱꦶꦁꦏꦸꦫꦁꦢꦶꦤꦭꦂꦱꦢꦸꦫꦸꦁꦔꦺꦭꦤ꧀ꦩꦂꦒꦲꦉꦥ꧀ꦤꦼꦠꦼꦥ꧀ꦥꦶꦏꦱꦒꦸꦃꦲꦤ꧀ꦤꦺ꧈ꦲꦤꦏ꧀ꦏꦺꦮꦢꦺꦴꦤ꧀ꦢꦶꦏꦸꦁꦧꦤ꧀ꦤꦏꦺ꧉

ꦲꦤꦲꦶꦁꦮꦼꦏ꧀ꦠꦸꦮꦺꦴꦁꦩꦠꦶꦭꦤ꧀ꦲꦉꦥ꧀ꦢꦶꦱꦫꦺꦏ꧀ꦲꦏꦺꦕꦫꦏꦠꦺꦴꦭꦶꦏ꧀ꦧꦶꦪꦱꦤꦺꦲꦺꦴꦫꦭꦤꦁꦲꦺꦴꦫꦮꦢꦺꦴꦤ꧀ꦢꦶꦲꦒꦼꦩ꧀ꦩꦶꦧꦸꦱꦤꦱꦶꦁꦲꦥꦶꦏ꧀꧉ꦏꦶꦠꦱꦶꦁꦲꦶꦱꦶꦃꦲꦸꦫꦶꦥ꧀ꦥꦢꦶꦤ꧀ꦠꦼꦤ꧀ꦤꦤ꧀ꦥꦿꦕꦪꦪꦺꦤ꧀ꦮꦺꦴꦁꦱꦶꦁꦩꦠꦶꦲꦉꦥ꧀ꦱꦺꦴꦮꦤ꧀ꦤꦺꦁꦥꦔꦺꦫꦤ꧀꧉ꦩꦸꦭꦪꦱꦥꦤ꧀ꦠꦼꦱ꧀ꦱꦺꦔꦁꦒꦺꦴꦥꦏꦻꦪꦤ꧀ꦱꦶꦁꦲꦺꦤ꧀ꦢꦃꦭꦤ꧀ꦥꦤ꧀ꦠꦼꦱ꧀꧉ꦱꦩꦤꦲꦸꦒꦪꦺꦤ꧀ꦏꦶꦠꦲꦉꦥ꧀ꦝꦺꦫꦺꦏ꧀ꦧꦺꦴꦗꦤꦌꦏꦫꦶꦱ꧀ꦠꦶꦩꦼꦱ꧀ꦠꦶꦤꦺꦪꦔꦁꦒꦺꦴꦥꦏꦻꦪꦤ꧀ꦱꦶꦁꦲꦥꦶꦏ꧀ꦲꦸꦠꦮꦥꦤ꧀ꦠꦼꦱ꧀ꦲꦺꦴꦫꦥꦽꦭꦸꦱꦶꦁꦭꦫꦁꦭꦫꦁ꧉

ꦤꦔꦶꦁꦏꦱꦸꦚꦠꦤ꧀ꦤꦺꦱꦲꦶꦏꦶꦲꦏꦺꦃꦮꦺꦴꦁꦩꦶꦮꦶꦠ꧀ꦠꦶꦥꦏꦻꦪꦤ꧀ꦱꦲꦤꦤꦺ꧉ꦧꦸꦧꦁꦱꦏꦩꦶꦱꦩꦲꦸꦠꦼꦫꦸꦱ꧀ꦥꦝꦢꦺꦴꦭꦤ꧀ꦢꦢꦶꦤꦺꦁꦒꦿꦺꦗꦔꦁꦒꦺꦴꦥꦏꦻꦪꦤ꧀ꦫꦶꦭꦺꦏ꧀ꦱ꧀ꦏꦲꦺꦴꦱ꧀ꦱꦤ꧀ꦱꦟ꧀ꦝꦭ꧀ꦭꦤꦝ꧉ꦤꦔꦶꦁꦲꦤꦲꦸꦒꦱꦶꦁꦮꦁꦱꦸꦭꦤ꧀ꦱꦶꦁꦥꦼꦤ꧀ꦠꦶꦁꦲꦠꦶꦤꦺ꧉ꦲꦥꦏꦶꦠꦪꦮꦤꦶꦮꦁꦱꦸꦭꦤ꧀ꦏꦪꦩꦁꦏꦺꦴꦤꦺꦴꦪꦺꦤ꧀ꦠꦼꦏꦤꦺꦁꦲꦸꦊꦩ꧀ꦩꦤ꧀ꦩꦤ꧀ꦔꦺꦤ꧀꧉ꦱꦶꦁꦤꦺꦁꦗꦧꦲꦶꦏꦸꦲꦸꦒꦲꦱꦿꦶꦁꦢꦢꦶꦏꦕꦥꦼꦔꦶꦭꦺꦴꦤ꧀ꦲꦶꦁꦗꦼꦫꦺꦴꦤꦶꦁꦲꦠꦶ꧉ꦏꦲꦺꦤ꧀ꦢꦃꦲꦤ꧀ꦱꦮꦶꦗꦶꦤꦶꦁꦮꦺꦴꦁꦲꦺꦴꦫꦩꦸꦁꦢꦶꦢꦭꦺꦴꦏ꧀ꦱꦏꦗꦧꦤꦔꦶꦁꦱꦏꦗꦼꦫꦺꦴꦤꦶꦁꦲꦠꦶꦠꦼꦠꦼꦩ꧀ꦧꦸꦁꦔꦤ꧀ꦭꦤ꧀ꦠꦶꦤ꧀ꦢꦏ꧀ꦠꦤ꧀ꦢꦸꦏ꧀꧉

ꦥꦶꦪꦺꦱꦶꦁꦢꦶꦥꦠꦿꦥ꧀ꦲꦏꦺꦪꦺꦤ꧀ꦏꦶꦠꦝꦺꦫꦺꦏ꧀ꦧꦺꦴꦗꦤꦌꦏꦫꦶꦱ꧀ꦠꦶ꧈ꦲꦥꦏꦶꦠꦔꦺꦭꦶꦁꦔꦶꦪꦺꦤ꧀ꦲꦶꦁꦧꦺꦴꦗꦤꦌꦏꦫꦶꦱ꧀ꦠꦶꦒꦸꦱ꧀ꦠꦶꦄꦭ꧀ꦭꦃꦱꦶꦁꦥꦫꦶꦁꦲꦸꦊꦩ꧀ꦩꦤ꧀ꦏꦁꦒꦺꦴꦏꦶꦠ꧉ꦩꦸꦭꦮꦶꦱ꧀ꦱꦩꦼꦱ꧀ꦠꦶꦤꦺꦪꦺꦤ꧀ꦏꦶꦠꦚꦶꦪꦥ꧀ꦥꦏꦺꦲꦺꦴꦫꦩꦸꦁꦥꦏꦻꦪꦤ꧀ꦲꦤꦁꦔꦶꦁꦲꦸꦒꦲꦠꦶꦭꦤ꧀ꦥꦶꦏꦶꦂꦫꦤ꧀꧌ꦏꦧꦺꦃꦥꦿꦶꦧꦢꦶꦏꦶꦠ꧍꧉ꦩꦸꦒꦩꦸꦒꦏꦶꦠꦏꦧꦺꦃꦱꦁꦱꦪꦧꦶꦱꦔꦺꦴꦂꦩꦠ꧀ꦠꦶꦧꦺꦴꦗꦤꦌꦏꦫꦶꦱ꧀ꦠꦶ꧉

ꦱꦶꦁꦢꦶꦲꦸꦊꦩ꧀ꦩꦶꦝꦶꦱꦶꦏ꧀ꦥꦝꦤꦸꦭꦏ꧀ꦥꦫꦤꦧꦶ꧈ꦭꦶꦪꦤꦺꦥꦝꦤꦩ꧀ꦥꦶꦏ꧀ꦲꦸꦊꦩ꧀ꦩꦤ꧀ꦱꦏꦱꦁꦏꦿꦶꦱ꧀ꦠꦸꦱ꧀ꦭꦤ꧀ꦥꦫꦫꦱꦸꦭ꧀꧉ꦤꦔꦶꦁꦧꦺꦴꦗꦤꦢꦶꦠꦼꦫꦸꦱ꧀ꦱꦏꦺꦲꦮꦶꦠ꧀ꦱꦥꦧꦲꦺꦏꦼꦤꦠꦼꦏꦲꦁꦒꦼꦂꦫꦺꦔꦿꦱꦸꦏ꧀ꦲꦶꦁꦱꦁꦭꦿꦺꦴꦱ꧀ꦠꦸꦱ꧀ꦭꦤ꧀ꦔꦼꦠꦺꦴꦏ꧀ꦲꦏꦺꦮꦺꦴꦃꦲꦶꦁꦲꦸꦫꦶꦥ꧀꧉

ꦱꦼꦩ꧀ꦧꦃꦪꦁ

ꦒꦸꦱ꧀ꦠꦶꦫꦩꦏꦮꦸꦭꦲꦶꦁꦱ꧀ꦮꦂꦒꦏꦮꦸꦭꦩꦸꦚ꧀ꦗꦸꦏ꧀ꦱꦼꦩ꧀ꦧꦃꦤꦸꦮꦸꦤ꧀ꦢꦺꦤꦺꦥꦸꦠꦿꦢꦊꦩ꧀ꦱꦩ꧀ꦥꦸꦤ꧀ꦏꦲꦸꦠꦸꦱ꧀ꦔꦿꦮꦸꦃꦲꦶꦏꦮꦸꦭ꧉ꦏꦥꦉꦁꦔꦱꦧ꧀ꦢꦤꦶꦥꦸꦤ꧀ꦢꦶꦥꦸꦤ꧀ꦩꦔꦽꦠꦺꦴꦱ꧀ꦱꦶꦲꦶꦁꦠꦶꦪꦁꦠꦶꦪꦁꦲꦶꦁꦏꦁꦔꦤ꧀ꦠꦸꦲꦤ꧀ꦠꦸꦱꦒꦼꦢ꧀ꦢꦶꦥꦸꦤ꧀ꦭꦸꦮꦂꦱꦏꦶꦁꦏꦫꦶꦧꦼꦢ꧀ꦢꦤ꧀ꦤꦶꦥꦸꦤ꧀ꦭꦤ꧀ꦠꦫꦤ꧀ꦱꦁꦏꦿꦶꦱ꧀ꦠꦸꦱ꧀ꦒꦸꦱ꧀ꦠꦶꦏꦮꦸꦭ꧉

ꦲꦩꦶꦤ꧀

---

Waosan

Jaksa 11, 29-39a

Sapa baé sing metu dhisik dhéwé saka ing omah, bakal dakkurbanaké konjuk ing Pangéran.

Matéus 22, 1-14

Sapa baé sing ketemu, undangen bojana.

Panglimbang

Wong-wong Israèl angèl banget arep ninggal brahala-brahalané. Ing kéné tinemu tuladhané. Yephta prasetya marang Pangéran sing kurang dinalar sadurungé, lan marga arep netepi kasaguhané, anaké wadon dikurbanaké.

Ana ing wektu wong mati lan arep disarèkaké cara Katolik, biasané ora lanang ora wadon diagemi busana sing apik. Kita sing isih urip padintenan pracaya yèn wong sing mati arep sowan nèng Pangéran. Mula ya sapantesé nganggo pakèan sing éndhah lan pantes. Samana uga yèn kita arep ndhérék bojana ekaristi, mestiné ya nganggo pakèan sing apik utawa pantes, ora perlu sing larang-larang.

Nanging, kasunyatané saiki akèh wong miwiti pakèan "sak anané". Bubar saka misa mau terus pada dolan, dadi nèng gréja nganggo pakèan rileks: kaosan, sandalan. Nanging, ana uga sing wangsulan: "sing penting atiné". Apa kita ya wani wangsulan kaya mangkono yèn teka nèng uleman mantèn? Sing neng njaba iku uga asring dadi kaca pengilon ing jeroning ati. Kaéndahan sawijining wong ora mung didhelok saka njaba, nanging saka jeroning ati, tetembungan lan tindak-tanduké.

Piye sing dipatrapaké yèn kita ndhérék bojana ekaristi? Apa kita ngélingi yèn ing bojana ekaristi, Gusti Allah sing paring uleman kanggo kita. Mula wis samesthiné yèn kita nyiapaké, ora mung pakèan ananging uga ati lan pikiran (kabèh pribadi kita). Muga-muga kita kabèh sangsaya bisa ngormati bojana ekaristi.

Sing diulemi dhisik padha nulak para nabi. Liyané padha nampik uleman saka Sang Kristus lan para rasul. Nanging bojana diterusaké. Awit sapa baé kena teka. Anggeré ngrasuk ing Sang Kristus lan ngetokaké wohing roh.

Sêmbahyang

Gusti, Rama kawula ing swarga, kawula munjuk sembah nuwun déné Putra Dalem sampun kautus ngrawuhi kawula. Keparenga sabdanipun dipun mangertosi ing tiyang-tiyang ingkang ngantu-antu sagedipun luwar saking karibedanipun. Lantaran Sang Kristus, Gusti kawula.

Amin.